Onthou jy vir Ouboet en Yollie? Hulle is terug!
Een van die 1980's se gewildse paartjies, uit Orkney Snork Nie, is eersdaags weer terug op die kassie.
Yollie, Ouboet en Hendrikkie het sak en pak uit Orkney getrek en vind hulself nou in die buitewyke van Johannesburg waar Ouboet en Hendrikkie hulself as entrepeneurs posisioneer en elkeen hul eie besigheid bestuur.
Die splinternuwe televisie reeks uit die pen van Willie Esterhuizen bring die gewilde karakters uit Orkney Snork Nie, Vetkoekpaleis en Molly en Wors weer bymekaar.
Die resultaat is 'n komiese reeks met Frank Opperman, as Ouboet van Orkney, aan die stuur van sake.
Wors Visagie, (Willie Esterhuizen) is sy staatmaker vriend en konfidant en natuurlik is altwee se vrouens ook betrokke.
Yollie (Sally Campher) en Molly (Liz Meiring) hou nie net hulle mans op hulle tone nie, maar wys dat oud beslis nie koud is nie.
Die kinders, wat nou al mooi groot is, maak ook gereeld hulle verskyning.
Hendrikkie (Kaz McFaden) en Gielie (Wynand von Vollenstee) moet die ooms in toom hou.
En wat sal 'n reeks wees sonder 'n blonde bombshell? Boeboe, (Liane Heyl) of te wel "Antie Boeboe" vir Gielie is terug in al haar glorie.
Die geliefde Boeboe (Liane Heyl) het haar Vetkoekpaleis hoedjie opgehang en is nou aan die stuur van Beauty with Boeboe.
Kyk uit vir hierdie opwindene reeks wat binnekort op KykNet uitgesaai sal word.