KYK: Swartmamba kuier in Mpumalanga-inwoner se stort
Dit is nie die tipe verrassing wat jy wil ontvang nie…
Wat sal jy doen as jy rustig in jou badkamer instap en nie net enige slang nie, maar 'n swartmamba in jou stort vind?
Wel, dit is presies wat met 'n vrou van Hazyview in Mpumalanga gebeur het.
Irma Kuschke het aan Netwerk24 vertel dat sy eers gedink het dis 'n aap toe sy vreemde geluide vanuit haar badkamer hoor.
Toe sy uiteindelik gaan kyk waar die geluide vandaan kom, was sy geskok om te sien dat een van die gevaarlikste slange in die wêreld, ’n swartmamba, in haar badkamer wegkruip.
"Ek het die deur verskriklik vinnig toegeslaan toe ek besef wat ek sien," het sy gesê.
READ: Klein Eben Beukes kry sy engel-vlerkies
Volgens Netwerk24 was Kuschke alleen by die huis.
Gelukkig is Kuschke se ma, Peggy, op 'n groep waarop slangvangers is.
Die Mpumalanga-inwoner het toe 'n foto van die 2,3 m lange slang geneem en haar ma gevra om dit op die groep te plaas.
"Ek het so deur die skrefie van die deur die slang afgeneem en die foto vir my ma gestuur om op die groep te sit. Die een ou sê toe dis ’n swartmamba en dat ’n opgeleide persoon hom moet verwyder."
Intussen het die slang al 'n asblik omgestamp, by die daklig opgeklim en hom uiteindelik tuisgemaak in die stort agter 'n seephouer.
Zac Scholtz, 'n bekende slangvanger, was besig om die Formule Een Grand Prix te kyk toe hy die oproep gekry het van die swartmamba.
"Ek onthou daardie dag duidelik omdat ek daardie dag heelwat slangverwyderings gedoen het. Dit was net ná 16:00 die middag en ek was besig om te ontspan en die Formule Een te kyk, toe ek 'n boodskap op ons plaaslike slanggroep ontvang het oor hierdie slang in die stort," het Scholtz aan News24 vertel.
"Dit was die sewende slang wat ek daardie Saterdag verwyder het. Dit was beslis 'n bogemiddelde dag. Ek het in Augustus gemiddeld so vyf slange per dag verwyder."
"Ek het gevra vir 'n foto van die slang sodat ek dit kon identifiseer. Die kliënt het 'n foto gestuur, en ek het dit geïdentifiseer as 'n hoogs giftige swartmamba."
LUISTER: Appel deel meer oor hartroerende nuwe enkelsnit
Die familie het sowat 40 km van Scholtz af gebly en toe hy uiteindelik daar aangekom het, kon hy duidelik sien dat Kuschke in skok was, alhoewel sy baie verlig was om hom te sien.
Dit het die bekende slangvanger sowat drie minute geneem om die slang heeltemal te verwyder.
Kyk hier:
Scholtz het gesê hulle is nie 100% seker hoe die slang in die badkamer ingekom het nie, maar hulle vermoed hy het deur die venster of deur ingekom op soek na koelte.
"Toe ek hom eers met my grypstok gevang het, het ek hom na 'n plek geneem waar daar volop kos en water is en weg van mense af," sê Scholtz.
"Swartmambas kan tot vier meter lank word en is baie algemeen in die Mpumalanga-gebied. Hulle is baie senuweeagtige slange, en baie mense is bang vir hulle.
"'n Mamba sal egter sy bes doen om kontak met mense te vermy. Net wanneer jy hulle in 'n hoek druk, sal hulle probeer byt as hulle voel hulle is in gevaar," het hy gesê.
Wat om te doen as jy 'n slang in jou huis vind
Bly Kalm en Veilig: Moenie paniekerig raak nie, en hou 'n veilige afstand van die slang.
Beveilig kinders en troeteldiere: Maak seker alle kinders, troeteldiere en ander gesinslede is in 'n veilige kamer of area.
Beperk die Slang: As dit moontlik is, maak die deur van die kamer waarin die slang is toe om dit ingesluit te hou. Jy kan ook 'n emmer of vullisdrom oor die slang plaas en dan 'n gewig bo-op sit om dit vas te hou totdat 'n professionele persoon opdaag.
Roep Hulp: Kontak 'n professionele slangvanger of plaaslike dierebeheer vir bystand.
Neem 'n Foto: As jy dit veilig van 'n afstand af kan doen, neem 'n foto van die slang om die professionele persoon te help met identifikasie.
Talle aanlyn bronne voeg by dat mens self die slang kan probeer verwyder deur dit by 'n deur uit te lei, maar net as jy 100% seker is dat dit veilig is om te doen.
Skakel in op 'Breakfast with Martin Bester', weeksdae van 06:00-09: 00. Stroom die program regstreeks hier of laai ons mobiele app hier af.
Luister na Jacaranda FM:
- 94.2
- Jacaranda FM App
- http://jacarandafm.com
- DStv 858/ OpenView 602
Volg ons op sosiale media:
FOTO: News24/ Zac Scholtz